प्युठान । नेकपा एमाले जिल्ला कमिटी प्युठानको सचिवालय बैठक सम्पन्न भएको छ । बैठकले मंसिर २७ देखि २९ गतेसम्म  काठमाडौमा हुने पार्टीको ११ औँ राष्ट्रिय महाधिवेशन भव्य रूपमा सम्पन्न गर्न प्युठान जिल्लाबाट जाने प्रतिनिधि सर्वसम्मत रूपमा चयन गर्ने सैद्धान्तिक सहमति गरेको छ। सहमति नजुटेका विषयहरू भने विधिसम्मत प्रक्रिया अपनाएर टुङ्ग्याइने बैठकले स्पष्ट पारेको नेकपा एमाले प्युठानका जिल्ला अध्यक्ष बिजय बिराज बिष्टको जानकारी दिनुभयो ।

सचिवालय बैठकले महाधिवेशन उद्घाटन सत्रमा प्युठान जिल्लाबाट व्यापक जनउपस्थिति सुनिश्चित गर्ने, साथै महाधिवेशन कार्यक्रमहरूको विस्तृत प्रचार–प्रसार गर्ने निर्णय पनि गरेको बिष्टले जानकारी दिनुभयो।

बैठक सफल बनाउन सहयोग पुर्‍याउने सबैप्रति कृतज्ञता व्यक्त गर्दै पार्टी नेतृत्वले प्युठानबाट एकताबद्ध र सशक्त सहभागिता सहित महाधिवेशनलाई सफल बनाउने प्रतिवद्धता शीत अगाडि बढेको पार्टी पोलिटब्युरो सदस्य एवं प्युठान जिल्ला इन्चार्ज सुर्य थापाले बताउनुभयो ।

विधान महाधिवेशनले सर्वसम्मत रूपमा पार्टीका नीति तथा कार्यक्रम अनुमोदन गरेको उल्लेख गर्दै थापाले अब नेतृत्व चयन गर्ने क्रममा अडिग, सक्षम र संकटमा राष्ट्र हितको रक्षा गर्न सक्ने व्यक्तित्व रोजिनुपर्ने आवश्यकतामा जोड दिनुभयो । ‘जो सङ्कटका क्षणमा देश र जनताको पक्षमा अटल रूपमा उभिन्छ, उही नेता हो, उही नेतृत्व हो,’ उहाँले भन्नुभयो, ‘आज राजनीतिक परिस्थितिले त्यही प्रकारको निष्ठावान्, दृढ र जिम्मेवार नेतृत्वको माग गरिरहेको छ।’

पछिल्लो राजनीतिक घटना क्रममा एमाले पार्टीलाई देशीविदेशी शक्तिहरुले घेराबन्दी गरेको सन्दर्भ दोहोराउदै यस्तो अवस्थामा राष्ट्रप्रेमी सम्पुर्ण नेता कार्यकर्ता यसको प्रतिकारमा जुरुक्क उठ्नुपर्ने बताउनुभयो । उहाँले अहिलेको राजनीतिक परिवेशमा देश र जनताको हितमा ‘चट्टानी अडान राख्न सक्ने नेतृत्व’ आवश्यक भएको बताउनुभएको छ ।

बैठक जिल्ला पार्टी अध्यक्ष बिजय बिरार बिष्टको अध्यक्षयता र पार्टी पोलिटब्युरो सदस्य एवं प्युठान जिल्ला इञ्चार्ज सुर्य थापाको प्रमुख आतिथ्यतामा भएको हो ।

जिल्ला पार्टी कार्यालय बिजुवारमा भएको सचिवालय बैठकमा केन्द्रिय सल्लाहकार परिषद सदस्य, प्रदेश कमिटी सदस्य, जिल्ला सचिवालय सदस्य लगायतको उपस्थिति रहेको थियो । बैठमा सबैले आ-आफ्नो धारणा राखेका थिए ।